وأنا ماشية في الشارع قبل يومين ، والا ألاقى هاللمة جدام باب المستشفى .. واحد طايح بنص الشارع ، وسيارة فان من صوب والإسعاف من صوب ثاني وأوادم ملتمين عنده . لأول وهله قلت الفان داعم الريال والإسعاف يايه تشيله.. بس بعد التمقل عدل والا أستوعب إن اللي بالأرض نايم على ظهره ، لو مدعوم جان تلاقيه متشرقد ومعفس وإيد بصوب وريل بصوب .. إنزين حتى لو مدعوم ، ليش رجال الإسعاف مو شايلينه لين الحين وليش على الأقل مو حاطينه في وضع النقاهه (recovery position)؟؟ واللي زاد الطين بله ، إن الأخ المنسدح رفع راسه شوي ، طل جدامه ورد راسه مرة ثانية على الأرض .. وأبدع ما في الأمر ، إني لاحظت إن اللي حواليه قاعدين يحاجونه جنهم قاعدين يحاولون يقنعونه بشي ..
طبعًا أنا الفضول ذبحني إلا بعرف شنو سالفته ، واسأل اللي يمي من اللي كانوا في الشارع: تعرفين شنو فيه؟ جان ترد لا .. عاد أنا ما جذبت خبر ، حسيت الوضع يبيله صورة ، جان آخذله صورة بالموبايل .. شوي والا الأخ قام من نص الشارع ، شال عصاته اللي يتركز عليها وراح صوب الرصيف!!!
السالفة طلعت إنه مسكين يأس من حياته جان ينسدح بنص الشارع علشان تدعمه سيارة !!! يعني ماكو حبل عندكم في البيت وسقف؟ والله أهون من هالعبالة .. عاد شكله ما كان يوحي إنه متشرد والا ما عنده بيت .. ولا.. شكله بعد توه في الثلاثينات أو شي.. ما يندرى شللي خلاه يسوي جذي .. مسكين ..
بس ما نقول إلا الشكوى لله والحمدلله على نعمة الإسلام والإيمان يا رب ... الدنيا ماهي خالية من المشاكل ، كبيرها وصغيرها بس عاد حلاة اللي يصبر وربي إن شاء الله بيفرجها عليه ، وحتى لو ما انفرجت قريبًا فأجر الصبر كبير .. يقول تعالى في سورة البقرة (155-157):
"وَلَنَبْلُوَنَّكُمْ بِشَيْءٍ مِنَ الْخَوْفِ وَالْجُوعِ وَنَقْصٍ مِنَ الأَمْوَالِ وَالأَنْفُسِ وَالثَّمَرَاتِ وَبَشِّرِ الصَّابِرِينَ. الَّذِينَ إِذَا أَصَابَتْهُمْ مُصِيبَةٌ قَالُوا إِنَّا لِلَّهِ وَإِنَّا إِلَيْهِ رَاجِعُونَ. أُولَئِكَ عَلَيْهِمْ صَلَوَاتٌ مِنْ رَبِّهِمْ وَرَحْمَةٌ وَأُولَئِكَ هُمُ الْمُهْتَدُونَ".
لا حوله ولا قوة الا بالله....صج من قال اهل العقل براحه....بالله عليك هذه سوووات يتمغط بالسكه وتعالوا دعموني؟؟